Kitaulo cha maajabu cha Ivo chatua Taifa..alikuwa anakitumia chalenji

KITAULO cha kipa wa Simba, Ivo Mapunda ambacho mashabiki wa soka Kenya wanakihusisha na imani za kishirikina kitaonekana leo Jumamosi ndani ya Uwanja wa Taifa katika mechi ya Nani Mtani Jembe dhidi ya Yanga.

Ivo amesajiliwa na Simba akitokea Gor Mahia ya Kenya ambayo ni watani wa jadi wa AFC Leopards pia ya Kenya. Kipa huyo aliyesajiliwa na Simba kwenye dirisha dogo amekuwa maarufu Kenya kutokana na kudaka penalti pamoja na kutundika kitaulo cheupe langoni.

Katika mechi za Gor Mahia na AFC kimekuwa kikiibua utata baina ya wachezaji ambao hukihofia huku mashabiki wa timu yake wakiamini kwamba kinawabeba na kumpa nguvu ya ushindi langoni.

Ivo alisema kwamba; “Hiki kitaulo ni cha kujifuta jasho tu wala hakina lolote.”

Mbali na AFC michezo mingine ambayo kitaulo hicho kiliibua utata ni dhidi ya Sofapaka na nyingine dhidi ya Tusker FC.

Tangu asajiliwe Simba mchezaji huyo wa zamani wa Yanga atakuwa anaonekana kwa mara ya kwanza akiwa amevalia jezi ya Simba kwenye mechi dhidi ya Yanga maarufu kama Mtani Jembe.

Mashabiki wamekuwa na hamasa ya kuona uimara wa kipa huyo waliyekuwa wakimuona kwenye runinga pamoja na mbwembwe za kitaulo chake ambacho hukitundika golini mechi inapoanza lakini baadaye hukishusha kwa shinikizo la waamuzi