HII HATARI SANA..!! KUMBE BUNGE LA TANZANIA LIMEJAA WABUNGE MATAPELI WALIOKUBUHU..!!

Siku chache tu zilizopita tulihoji mpango wa Bunge kuwapeleka wabunge nje ya nchi mara kwa mara kufanya kile kinachoitwa ziara za kikazi na mafunzo. Tulisema ziara hizo hazina tija kwa taifa, isipokuwa ni mkakati uliosukwa na Bunge kwa lengo la kuwanufaisha wabunge kifedha. Tulihoji sababu za kufuja fedha za umma kuwapeleka wanasiasa katika ziara hizo zenye gharama kubwa badala ya kupeleka wataalamu wetu walio katika sekta muhimu zinazotoa mchango mkubwa katika kukuza uchumi wa nchi yetu.

Pamoja na kusisitiza kwamba ziara hizo zinazoitwa za kikazi na mafunzo zimekuwa zikitumia mabilioni ya fedha za walipakodi, tulihoji sababu za Kamati hizo kushindwa kufanya majumuisho au kuonyesha jinsi gani wabunge wake na wananchi kwa jumla walivyonufaika au watakavyonufaika na ziara hizo.

Tulisema Kamati hizo zilikuwa zikishindana kuona ipi inafanya ziara nyingi zaidi kuliko nyingine au ipi inayowapeleka wajumbe wake katika nchi zenye ‘neema’ zaidi kuliko nyingine. Bila kumung’unya maneno, tulisema ziara hizo ni za kitalii na matanuzi zaidi kuliko kitu kingine, kwa maana ya kutoleta tija kwa Bunge wala taifa.

Tulionyesha jinsi wajumbe wa Kamati nane za Bunge walivyokuwa katika ziara mbalimbali ughaibuni kwa wakati mmoja. Kichekesho cha karne ni pale tulipoambiwa kwamba Kamati ya Hesabu za Serikali za Mitaa ilikuwa katika ziara ya Uingereza na Ireland eti kujifunza masuala ya serikali za mitaa. Tuliuliza ni jinsi gani mazingira ya Uingereza na Ireland yanafanana na ya Tanzania na kuhoji kwa nini ziara hizo zisingefanyika katika nchi za Afrika zenye mazingira yanayofanana na ya Tanzania? Wakati huo Kamati nyingine nyingi zilikuwa nje ya nchi katika ziara kama hizo. Ndiyo maana tulisema siyo lazima kuwa na shahada ya chuo kikuu kuweza kugundua kwamba ziara hizo zinazoitwa za mafunzo na kikazi ni za ujanja ujanja na ubadhirifu wa kupindukia.

Tumesema yote hayo kutokana na kashfa iliyolikumba Bunge juzi kwa taarifa kwamba wabunge wengi wamekuwa wakichukua posho za ziara hizo lakini wanakwepa kwenda, huku wakiweka fedha hizo mifukoni. Huu ni wizi wa mchana kweupe na ni kosa la jinai, wala siyo suala la kisiasa kama ambavyo wabunge wengi walivyotaka lionekane walipokuwa wakilijadili bungeni juzi. Kashfa hiyo inawahusu wabunge karibu wote na hii pia inahusu ziara zao mikoani, ambapo wengi wanachukua posho bila kufanya ziara hizo.

Tunatarajia kwamba kashfa hii kubwa haitazimwa hata kama Spika mwenyewe na uongozi wote wa Bunge utakuwa unahusika. Tunamtaka Mdhibiti na Mkaguzi Mkuu wa Hesabu za Serikali (CAG), apanue wigo kwa kukagua hesabu za Bunge na taasisi zinazosimamiwa na Kamati mbalimbali za Bunge ili kuona kama fedha zilizotolewa kwa wabunge kufanya ziara mbalimbali zilitumika kwa kazi hiyo.

Bunge hili la 10 limepoteza mwelekeo kwa wabunge kujawa na tamaa za kujirundikia mali na kutaka utajiri wa haraka. Sasa tunashuhudia wabunge wakidai na kupewa rushwa na mashirika wanayoyasimamia, huku safari na ziara zao nyingi zikigharamiwa na mashirika hayo. Uovu huo umewapofusha macho na kujaza kutu ndani ya dhamira zao. Ndiyo maana hatuoni mabadiliko ya kweli katika hulka, kauli na matendo yao. Badala yake tunashuhudia utapeli uliokithiri.
Source: Mwananchi