ACHENI KUMWANDAMA LOWASSA KWA KUWA ANAIJUA CCM VIZURI KULIKO HAWA WA KUJA, KAMA MUNGU ALIMPANGIA NAFASI FULANI KIUONGOZI, HAKUNA WAKUMZUIA.

Duniani  kote  inapofika  mwishoni  mwa  mwaka, jamii  hujumuika  makanisani, misikitini,kwenye  kumbi  za  starehe, majumbani  japo  kutoa  shukrani  zao  kwa  mwenyezi  Mungu  kwa  kuwawezesha  kuuona  mwaka  mpya.....

Katika  kuusindikiza  mwaka  ulioisha  2013  na  kuukaribisha  mwaka  mpya  wa  2014, aliyewahi  kuwa  waziri  mkuu  Edward  Lowassa  naye  aliamua  kujumuika  na  wageni  katika  sherehe  aliyoiandaa  jimboni  kwake  Monduli...

Ikumbukwe  kwamba, inapofika  saa  saba  kamili  usiku  wa  kuamkia  mwaka  mpya,hoihoi, vifijo  na  shamrashamra  vinasikika  kwa  staili  tofauti;wengine  wakirusha  fataki  hewani,wengine  wakipiga  debe,meli  zikipiga  honi,bendi  kwenye  kumbi  za  starehe  zikipiga  nyimbo  za  kuukaribisha  mwaka  mpya  ilihali  yote  yakiashiria  kufurahia  ujio  wa  mwaka  mpya.Mara  nyingi, viongozi  mbalimbali  hupata  nafasi  ya  kutoa  salamu  za  mwaka  mpya...

Waziri  mkuu  mstaafu, Lowassa,  katika  sherehe  hizo  aliyoiandaa  jimboni  kwake  Monduli  ya  kuuaga  mwaka  2013, mbele  ya  wageni  wakati  akitoa  salamu  ya  kuukaribisha  mwaka  mpya  alinukuliwa  akisema  "Anaanza  rasmi  safari  aliyoiita  ya  matumaini  ya  ndoto  za  watanzania  ya  kupata  elimu  bure, maji  safi  na  maendeleo  ya  uhakika"

Hata  hivyo, kwa  mshangao  wa  walio  wengi,baadhi  ya  watendaji  wa  juu  wa  CCM   na  baadhi  ya  watendaji  kutoka  UVCCM taifa  walijitokeza  hadharani  kubeza  kauli  hiyo  ya  Lowassa  utadhani  aliyoyatamka  yalilenga  kudhoofisha  nguvu  ya  chama  hata  kuitumbukiza  nchi  kwenye  mifarakano

Mmoja  wa  watendaji  wa  UVCCM aliyejitokeza  kumrushia  madongo  Lowassa  ni  katibu  wa  idara  ya  uhamasishaji  na  chipukizi  taifa, Paul  Makonda. Bila  kutaja  jina  la  mtu  lakini  akitafsiriwa  kumlenga  moja  kwa  moja  Lowassa  alisema, nanukuu: "Watu  wanatangaza  kutoa  elimu  bora, kwa  nini  wasifanye  hayo  kupitia  chama?"

Alienda  mbali  kwa  kudai  kwamba:"Kamati  ya  maadili  CCM inayoongozwa  na  Mangula  ilipaswa  kuonesha  wazi  hasira  zake  kwa  vitendo". Maneno  haya  kutoka  kwa  kiongozi  huyo  wa  chipukizi  siyo  tu  kwamba  yanachefua,bali  yanaonyesha  dhahiri  kukosekana  kwa  mafunzo  ya  awali  ya  itikadi  na  sera  ya  chama    kwa  makada  hawa  chipukizi.

Kuna  mambo  kadha  wa  kadha  yanayoitesa  CCM  na  jumuiya  zake  japo  wanajifanya  hawayaoni.Tatizo  kubwa  ni  kwamba  makada  wengi  wameambukizwa  gonjwa  hatari  la  kujipendekeza  kwa  wakubwa  ilimradi  kukamilisha  msemo  usemao:"Funika  kombe  mwanaharamu  apite".

Hakika  gonjwa  hili  la  unafiki,ubinafsi  na  kujikweza  kwa  sasa  limeenea  na  linatafuna  vyama  vyote  vya  siasa  hapa  nchini  na  siyo  CCM  pekee.Sioni  mantiki  kwa  Makonda, Nape Nnauye  na  wengine  wa  namna  yao  kushupalia  kauli  ya  Lowassa  ilihali  wakijua  wazi  pasipo  shaka  kwamba  mbunge  huyo  wa  Monduli  ni  mjumbe  halali  wa  halmashauri  kuu  ya  taifa  na  mojawapo  ya  majukumu  yake  kama  mjumbe  ni  kuendeleza  sera  na  ilani  ya  CCM  kwa  vitendo....

Kauli  ya  Lowassa  haikutofautiana  na  majukumu  halisi  yaliyoainishwa  kwenye  ilani  ya  uchaguzi  wa  CCM  kwa  ajili  ya  uchaguzi  mkuu  wa  mwaka  2010  kwa  kuzingatia  dira  na  maendeleo  ya  taifa  2025  na  malengo  ya  Millennia.

Kwa  faida  ya  wasomaji, napenda  kunukuu  sehemu  hiyo  ya  Ilani  inayosomkea: "Katika  kipindi  cha  ilani  hii  2010 - 2015,  mchakato  wa  kujenga  uchumi  wa  kisasa  utatekelezwa  katika  maeneo  yafuatayo:

"Kuimarisha  na  kuboresha  elimu, kuandaa  rasilimali  watu  katika  maarifa  na  mwelekeo, kufanya  mapinduzi  ya  kilimo, kufanya  mapinduzi  ya  viwanda  na  mengineyo  mengi"....

Kwa  kuwa  sera  ya  CCM ni  kutaka  kuwaletea  wananchi  elimu  bora, na  kwa  kuwa  falsafa  ya  Rais  Kikwete  ni  kutaka  kuwaletea  wananchi   maisha  bora  kwa  kila  mtanzania, na  kwa  kuwa  sera  ya  CCM  ndiyo  dira  ya  maendeleo  ya  taifa  2025, swali  la  kujiuliza, Je, Lowassa  alikosea  nini  hadi  Makonda  na  wenzake  wakashupalia  kwa  maneno  makali  eti  kamati  ya  maadili  CCM  ilipaswa  kuonyesha  wazi  hasira  zake  kwa  vitendo?

Kati  ya  Lowassa  na  Makonda, ni  nani  alipaswa  kuonyeshwa  hasira  na  kamati  ya  maadili  kwa  vitendo?  Nasema  bila  kumung'unya  maneno  kwamba  ukosefu  wa  mafunzo  ya  maadili  ya  chama  yaliyokuwa  yakitolewa  tangu  enzi  za  TANU,CCM  hadi  1972  hakika  umeleta  madhara  makubwa  kwa  makada  wapya  ndani  ya  CCM  na  jumuiya  zake...

Kumjengea  Lowassa  na  wenzake  wa  aina  yake  mazingira  ya  vitisho  ni  sawa  na  kumsafishia  njia  kwa  kupitia  mlango  wa  nyuma....

Kuna  baadhi  ya  makada  ambao   bado  wanaota  enzi  za  chama  kimoja  kushika  hatamu  ambapo  wanachama  walitishiwa  kutothubutu  kusogelea  nafasi  za  juu  bila  idhini  ya  wafalme  ambao  siku  zote  walifikiria  kuwarithisha  familia  nafasi  hizo....

Haiingii  akilini  kwamba  makada  hawa  chipukizi  ambao  hata  itikadi  na  mwongozo  wa  chama  hawavijui, eti  nao  wanadiriki  kumkemea  mjumbe  wa  halmashauri  kuu  hususani  mtu  kama  Lowassa  abaye  ni  kada  aliyebobea  na  anakifahamu  chama  kulikoni  huyo  Makonda  wa  kuja  ambaye  ni  mpya  kwenye  chama...

Uongozi  ni  kipaji  na  kamwe  kipaji  cha  mtu  hakiwezi  kuzuiliwa  kwa  staili  kama  hii  ya  kelele  za  chura  ambayo  haimzuu  ng'ombe  kunywa  maji....

Sina  nia  wala  sikusudii  kumfagilia  Lowassa, lakini  inapaswa  kueleweka  kwamba  Lowassa  hajitangazi  mwenyewe  wala  hajipitishi  kama  wengi  wanavyomfikiria.Bali  anatafutwa  na  viongozi  mbalimbali  kutoka  taasisi  za  kijamii  na  kidini  kwenda  kuimarisha  taasisi  hizo...

Wenzetu  wa  nchi  jirani  ya  Kenya, wao  walianza  siku  nyingi  kuchangia  taasisi  za  kijamii  kwa  staili  ya  harambee.Hata  kwenye  nembo  ya  kitaifa  inaonyesha  harambee  ikiwa  ni  ishara  ya  kuisaidia  jamii.Siyo  vibaya  hata  sisi  hapa  kwetu  tukaiga  jambo  hili  jema  na  ikawa  ni  sehemu  ya  utamaduni  wetu  katika  kuisaidia  jamii  yenye  matatizo....

Serikali  haiwezi  kuwafikia  wananchi  wake  kila  kona.Aidha  serikali  haiwezi  kuwatimizia  wananchi  mahitaji  yao  yote  pasipo  kuwahusisha  wananchi  na  viongozi  kwa  staili  ya  harambee...

Ushauri  wangu  ni  kwamba;watendaji  wakuu  wa  chama  na  jumuiya  zake, wapime  kwanza  uzito  wa  kauli  zao  kabla  hawajazitoa  mbele  ya  jamii.Watumie  busara  zaidi  katika  kuwaunganisha  wanachama   wao.Kurushiana  makombora  katika  muda  huu  mfupi  uliobaki  haitawasiadia...

Kitendo  cha  kuendelea  kumshupalia  Lowassa  kama  vile  ni  msaliti  wa  chama  kinakipunguzia  chama  haiba  na  mvuto  mbele  ya  jamii...

Mwacheni  Lowassa  na  watu  wa  aina  yake  wakitumikie  chama  badala  ya  kutikiswa  kila  mara  huku  wakitekeleza  sera  za  chama....

Kama Mungu  alimpangia  Lowassa  nafasi  au  hata  maisha  flani  ya  juu  kiuongozi, hakuna  yeyote  mwenye  ubavu  wa  kumzuia...

Uongozi  unahitaji  hekima  na  busara  na  si  vinginevyo. Mwacheni  Lowassa  kwa  kuwa  anaijua  vema  CCM  kulikoni  hawa  wakuja...

>>Kwa  hisani  ya: Tazama Tanzania